8/11/2008


السلام عليكم ورحمة الله وبركاته

شلونكم شالدنيا فيكم ... وينكم ماتبينون ياجماعه شكله عندكم بيات شتوي ذابحكم البرد السحتني من جذي ماتبينون

عاد شرايكم اليوم بزيد البروده بروده اكثر وبوديكم منتزه سيشيل اللي قبل كان اسمه كمبنسكي بس غيروه وصار سيشيل

يالله بسم الله

طبعا هني بداية الدخول للمنتزه ولازم وحتما عليك تصعد هالصعده عاد اللي بيسأل ليش مسوين هالصعده المقصد في بطن الشاعر

ومن بعد ماتصعد الصعده رايح للمنتزه تلاقي هالنافوره بويهك

خلونا شوي نتكلم عن المنتزه ... يقع في منطقة الجليعه جنوب البلاد ويمه بالضبط لاصق فيه منتزه الجون وصالح شهاب وقبلهم خليفه الجري يعني كلهم قريبين من بعض

فيه فوق الـ 100 شاليه طبعا بانواع مختلفه كل مجموعة شاليهات تختلف عن الثاني وبعد فيه نظام الغرف الفندقيه حق اللي يبي يحجز بو ليله واحد وزوجته يروح هناك يحجز يعني شغل عدل

والمنتزه عائلي بحت يعني شباب ممنوع لحد يتعب نفسه ويروح ترى يردونه ومثل ماراح يرجع وبالنسبه للعوايل الدخله للشخص الواحد 10 دنانير حق اللي ماعندهم شاليهات واللي عندهم شاليه حاجزينه دخلة الشخص الواحد 5 دنانير يابلاش الله يديم الرخص الصراحه

نكمل رحلتنا داخل المنتزه يالله

 

جانب من الشاليهات المطله على البحر

المسابح

خدمات تنظيف الملابس على مدار الساعه يعني ماكو مشكله اذا توصخت هدومكم دقوا عليهم وعلى طول اييونكم برسم الخدمه

خيمه جدام شاليه ومجابل البحر ... حط جويهتك وقهوتك وشوية حب وطيحوله قراض

قواري للاطفال ... وشكله هالشبل يبي يتعلم على التقحص من صغر جنه بيسحب سايد الحبيب

وهذا شبل آخر يلعب كرة قدم شاطئيه .. بس خوش دلاغ لابس الصراحه يديد اول مره اشوف هالنوعيه من الدلاغات

منقذ بحري يتأمل في البحر يدور احد غرقان ينتشله شي مني مناك

لمحبين الشيشه يمدحون شيشتهم ترا يقولون خوش شي انا ما أروج لها لا يبا مالي شغل في هالسوالف بس اكيد الاجواء حلوه دام مجابل البحر شي طبيعي بتكون الاجواء جميله جدا

شبل ثالث طحنا عليه بين الشاليهات قاعد ينطط بالكره بروحه الظاهر والله اعلم عنده بطوله او انه يحاول يتدرب عشان يطلع محترف في المستقبل ... يالله ان شاءالله الله يوفقك ولو اني ادري انه ربعنا هني بالاتحاد ماوراهم احتراف بس يالله مايندرى نقول ان شاءالله والباجي على الله

برمه مقلوبه وبرمه معدوله

للنساااااء فقط قالوا للنساء الأولاد اللي اكثر من 3 سنين لايوطوطون صوب مسبح النساء يالله اهو مناك

يالله طاحت في بطونكم اصحاب العضلات المفتوله ماكو مشكله حق اللي بيمارس هواية دق الحديد ورفع الاثقال موفرينها لكم ادارة المنتزه

بلياردوا على الطريق

وتنس أرضي بعد

وبيبي فوت بعد .. لا اقزرت

وعندكم هالمطاعم الطيبه اللي تطل على البحر وتطل على المسابح ياعيني والله خوووووش شي

وهذا سرير في احد غرف النوم جذي بوريكم نمونه بس

معلم شاورما ... ترا عليه خوش شاورما والله ما اوصيكم فيه تاكلون منه ماتشبعون

منظر عام لمنتصف المنتزه

ونودعكم على امل اللقاء بكم في القريب العاجل بأذن الله

محدثكم من قلب الحدث .. دندرن

العوده للصفحه الرئيسيه