بدت فترة السرايات عندنا ولله الحمد وبدا الخير يهل والامطار والبردي .. اللهم لك الحمد
في البدايه لابد من تبيان نقطه مهمه جدا وهي :
الصور اللي مكتوب عليها منقول من جريده او من ايميل فهي ليست لي … والصور اللي مكتوب عليها
Photo by [email protected]
فهي لي
ونكمل رحلتنا اللي صارت في ذاك اليوم ونتوكل على الله
وانا توني طالع من الدوام رايح بيتنا … لوية الشغل وتعب العمل وسهر الليالي والجو كان مافيه شي صباحا فلما صار الضحى اقلبت الدنيا شوي وبدت الغيوم تغطي السما
وبدأت هبات المطر ترفرف شوي شوي
طلعت من الدوام في امان الله رايح بيتنا والا هالسما تبرق … يالله سترك
شكله بدايتها تبشر في امطار غزيره والله اعلم
واكمل في طريقي للمنزل والمطر يزداد
وحلاتها على هالجو تدش جو ثاني عاد المهم افصل عن جو الدوام دش اي جو بس غير جو الدوام عاد كل واحد وجوه انت معاك جوك واهو معاه جوه وكل واحد وجوه
اي لا زين ملتزمين بقواعد السير والمرور يطقون اشاره الحمدالله … ويقولون الكويتيين مايلتزمون بالمرور … حجي فاضي اصلا معروفين احنا يالكويتيين اذا طق مطر محد يدوس ولايقحص ولايستنفرون كلش
احسن ناس تمشي بالمطر احنا
وانا في طريقي للمنزل
ها اشعندكم عرس والا حفله ؟؟ مودين الكراسي وين ؟؟
وانا في طريقي للمنزل
انزين ليش ماشبوا ليتات الشوارع ؟؟؟ انا خابر اذا ظلمت الدنيا شوي اتشب ليتات الشوارع ليش ماشبوا ؟؟
يالله فرصه يا اعضاء مجلس الأمه بعد روحوا استجوبوا … خو انتوا على كل شي بس بتستجوبون جنه ماعندكم شغل في هالمجلس الا الاستجوابات ماتشوفون الامور اللي اهم من سوالفكم ومصالحكم وخلافاتكم الشخصيه
ياسلام بدت عمارات دولتنا الحبيبه تغيب بسبب الغيوم اللي يومها كانت نازله
اويلي عاد يوعان … بس تدرون خل اكمل بيتنا ماكو احسن من طباخ البيت
لا من امه اختفت عماراتنا الشاهقه
الله اتوقع من احلى ايام عمر المقاول يومها انه يكون في الطوابق اللي اختفت واهو يشم النسيم العليل والغيم يدش عليه من هالصوب ويكفخه الصوب الثاني
شوي مختفي وشوي طالع هم زين ناس تحس بنسيم عليل وناس ماتحس بنسيم عليل
هذا برج التحرير … جنه حاشه طشار الغيم
ركزوا عدل ترى برج التحرير بالنص بس اختفى بالمره ماقام يبين كلش ملش
ويزداد المطر يارباه
ماشاءالله تبارك الرحمن
اي شعليك يبا سيارتك جيب مايهمك لو مثل سيارتي جان تسبح بالماي اقلبها طراد 4 قدم احسن لي
الحين وين السايد الرايح من اللي راد
ها صافين على كتر تعالوا هالصوب مافيكم احد يغامر وايي هالصوب ها
يالله نطروا اتوقع طولتوا بالنطره عاد شوفوا الباص وقتها وين كان ومتى طلع من الزحمه اللي كان فيها فنطروا
هوبااااا … يعطيه العافيه لياقه ماشاءالله … الحبيب عابر قارات صار
هيلا هوب هيلا هوب … يالله شدوا الحيل مابقا شي وتوصلون
يالله ترى خير ونعمه الحمدالله
الله يعينكم … انزين والحبيب اللي واقف في الباص شنو نظام شماته يعني ؟؟ خو انزل ساعد الريّال في مهمته
ولله الحمد وصلت بيتنا في سلام قلت عاد خل اصعد فوق السطح اشوف شكو ماكو شصاير حوالين بيتنا والا ششوف 
الله اكبر … برك من الماي ماشاءالله ارتوت الارض عدل
اتهقون زلق ؟؟
هذا الحبيب بيتهم جدام بيتنا وبسرداب بيتهم حاطين نجار يسوي لهم كبتات حق البيت وسوالف عاد المطر كله نزل عليه بالسرداب وعفس الاولي والتالي عنده بالسرداب فقالك ماكو الا هالطريقه يسكر فيها باب السرداب المشرّع
يالله هاردلك يالحبيب
عاد هني تغديت وبعدها خذيت لي قيلولة شوي ولما قعدت من النوم والا اشوف هاللويه صايره عندنا بالمنطقه
شنو هذا ثلج ؟؟؟ ضاحية عبدالله مبارك فيها ثلج ؟؟
ياعمري شنو هذا ؟؟ لندن لندن مو عبدالله مبارك
اي يبا لعبوا فرصه هالسوالف ماتصير دايم عندنا بالكويت يالله فرصه ياشباب
لا جنه السالفه صج والله
اهم مافي الموضوع رقم 11 يازينكم يالقدساويه
ماشاءالله عطونا شوي شدعوه
لايروح بالكم بعيد ترى مو تقحص … كل ماهنالك انها تواير سيارات وزلق فتلاقون السياره من كيفها تاخذ يمين يسار … احنا قلنا في بداية الموضوع الكويتيين احسن ناس يمشون في المطر والزلق فعادي يعني
الله يعينكم السرداب انترس ثلج … خو في طريقه ثانيه اذا بتشيلون الثلج من السرداب … ييبوا دفايات والا استشوار وحطوه على الهوى الحار وشغلوهم بالسرداب ويروح الثلج بلا هالعربانه وتشيلون فيها تعب عليكم ياجماعه
الشباب مو مصدقين
يالله قري قري يالطيب مالك طريج هناك … والله الرصيف مو مبين من الشارع
يالله خل نروح شوي على الخطوط السريعه المقابله للمنطقه ونشوف شفيها
اويلااااااه مو صج ياشينج من كلمه
والله يقولون والعهده على الراوي انه الدائري السابع وقف بسبة البردي اللي نزل على الخط
ماشاءالله
مساحات شاسعه من الثلج … عسى ان شاءالله دايم يطق علينا ابردي
اوله من تزحلق بيصير لو احد يدش بسيارته هني
بايعها الطيب
وبدات الامور بالهدوء
نظرة تأمل للثلج
ونشوفكم على خير وفي أمان الله والله يديم علينا الخير يارب
