17/4/2010

صبحكم الله بالخير

اليوم صباحا الموافق 17-4-2010 صحيت من نومي على صوت شي يطق بدريشتي حيل ... قلت يالله صباح خير منو اللي صاعدلي لي فوق وقاعد يطق الدريشه شلون وصل ؟؟ ويقرقع طخ طخ طخ

ياااااه شلون يعني ما انام ؟؟؟

فقمت من النوم اطل من الدريشه والا ششوف ؟؟

لااله الا الله يالله صباح خير ... وبداية مع درامات الزباله محذفه بالشارع وانتوا بكرامه

وهني الساعه 7.43 صباحا يعني الشمس المفروض تكون طالعه كلها والنور ساطع تماما ... وماكو شمس ياسبحان الله

الشير شوي وينشلع من مكانه سبحان الله

لااله الا الله الدنيا برتقاليه سبحان الله

ظلمه ظلمه تقول الساعه 8 مساءا

اي زين الجيران متحسبين من هالامور ومسكرين الشترات

الا انا شعندي مخليهم مبطلين بالله ؟؟

وبدأت الامور شوي شوي اتفج في غضون 6 دقايق بس

جان يقلب الهوى مره ثانيه ويطق مطر

ماشاءالله ... يالله انك تزيده وترحمنا برحمتك يارب

ياعيني ومع زخات المطر وصوت المطر اللي يرد الروح اياباااااااه

ها بريحاتج وين رفيجتج اللي مساع مخاويتج في السراء والضراء

وبدأت حبات البرد الخفيف ينزل يا الله شنو هالجو الحلو

مو ملحقه البالوعه هههههههههههه زحمه زحمه لووود

طق يامطر طق بيتنا يديد مدعابنا حديد

وحبات المطر الجميل تتناثر من هنا وهناك

وانت يالطيب مو وقته الحين تنبعص في المطر والا الهوى القوي يطيرك خل عنك قواطي الحليب اللي شاريهم وروح بيتكم لاحق عالجاي والحليب يالطيب

وفي خلال 45 دقيقه فقط عاد الجو ولا احلى ولا اروع لااله الا الله وهذا مايسمونه الحين بموسم السرايات اللي يبدا من منتصف شهر ابريل 4 لغاية شهر مايو

فديروا بالكم خلال هالفتره ترى قلبة الجو بدقيقه يعني لاتشدون حيلكم وتقولون الله الجو مال طلعة بحر وتروحون بطراريدكم يعني اقوياء ترى والله لفحة هوى بسيطه والا ما اشوفكم الا بالمحيط الهندي تلقطون زوري

فـ الله يستر عالجميع ان شاءالله واخليكم الحين واروح اكمل نومتي علي بستين الف عافيه

فمان الله واذا صار شي بالجو وانا نايم بلغوني ما اوصيكم

العوده للصفحه الرئيسيه