15-12-2004

السلام عليكم ورحمة الله وبركاته

كان يوم الأربعاء 15 - 12 - 2004 مشهودا بسبب هطول الأمطار الغزيره على دولة الكويت .. أعاد لنا ذكرى يوم الثلاثاء الموافق 11 - 11 - 1997 يوم اغرقت الكويت بسبب هطول الامطار فقط لمدة ساعتين ... والحين تعالوا نشوف شنو صار في هاليوم الجميل والرائع في نزول الخير على الكويت ونتجول شوي في شوارع الكويت في وقت نزول المطر ووقت الزحمه ووقت الغرقه

قمت من النوم في الصباح الباكر وبكل همه ونشاط عشان اروح الدوام بدلت وخلصت شغلي ودقيت سيارتي سلف وانا قاعد اشوف المطر ينزل على السياره وانطر لين تسخن السياره عشان احرك خو برد بعد شنو ؟؟ لازم الواحد يحرر سيارته مو دق سلف وامش ... وهذي لكم يابعض الناس اللي يدقون سلف ويحركون على طول ^_^

المهم حركت من البيت باتجاه الدوام والا ماشاءالله اشوف هالمطر يرفرف ههههههه  ترى موبدليه هذي سالفة شخص عزيز علي كله يقول المطر يرفرف مادري ليش رابط المطر بالعلم لما يرفرف ... والجو بديع والدنيا غيم والرؤيه شبه معدومه حتى ايدك ماتشوفها بززززززز

المراد ماطولها عليكم تعالوا نشوف الصور ونمشي حته حته مع الحدث من بداية ذهابي للدوام لغاية عودتي للبيت ..

هني كانت الساعه سبع صباحا ... ماشاءالله جنه الساعه 7 بالليل وذلك لشدة المطر اللي كان قاعد يطق ... ياعمي اي مطر يرفرف اي بطيخ الله يستر بس

ويزداد المطر ماشاءالله تبارك الرحمن والشارع ماقام يبين منه شي لاشارع ولاسيارات اتبين الله يستر ان شاءالله

هني خو ماكو شي بعد خرمس صار الشارع ... اتحدى اي واحد يقول انا كنت امشي في اي حاره بالشارع ؟؟

وقفت عند احد الجسور وهني كانت الساعه تقريبا سبع وخمس دقايق والدنيا ليل سبحان الله ... واشوف والله جنه الشارع فيه شوية ماي

يعني قعدت بين البينين في ماي والا مافي ماي مادري والله يعني ماكنت متأكد من وجود الماي

هني تأكدت انه اكو ماي أحلف بس اكو ماي ؟؟ يعني بالله هالسياره اللي دشت بالماي ومومبين منها شي شنو معناته ؟؟

خلصنا من الجسر ولله الحمد والحين سلكت طريق الدائري الرابع باتجاه الدوام ماوعيت الا هاللي صار لي

هوب هوب هوب شنو هذا يانااااااااس اوله اوله اشصاير بالدنيا يبا .. يواش يواش يامعودين ... جنه واحد ماسك له هوز مطافي وقاعد يصب ماي 

ولييييييييييييه ماقمنا انشوف يايبا ... بالله شوفوا اكو جدامي سيارات والا لأ ؟؟

والا شنو صاير ؟؟ وحده بنت حلال يايه مسرعه دايسه حدها حسبالها سيارتها الحين اسكت وموعاجبها الشارع كلش والماي تارس الشارع وسياره مسرعه شنو يصير ؟؟ كل الماي اللي بالشارع يطشر عليك جنه يايب هوز وقاعد يصب عليك ... الحمدالله زين مو امبطل الجام والا جان صار فلم موطبيعي

يالله الله يسامحج

الرصيف ماقام يبين من الماي اللي غطى كل شي

المهم وصلت دوامي ولله الحمد ومالقيت الا الفراريش بس وكنت اول واحد يوصل في دوامنا ... عيل وين الاوادم اللي وياي محد منهم وصل عسى ماشر ؟؟ انا خو ماادري ليما الحين انه الديره اغرقت حسبالي الوضع عادي ^_^ دق علي واحد من الربع جان يقولي يافلان ترى انا متغلقص بالشارع ويدق الثاني والثالث وغيرهم وغيرهم وشوي جان يوصلون بعض الزملاء معاي بالدوام المهم يومها صفينا على خمس موظفين بس ^_^ وتريقنا بالدوام كان احد الزملاء يايب معاه ريوق وشطبنا عليه كله خو الواحد بالمطر النفسيه تتعدل وتنفتح الشهيه للأكل ... المهم بلغونا انه اليوم عطله رسميه فقررنا الرجوع لبيوتنا وقعدنا شوي بالدوام على ماتخف الزحمه بالشوارع ولكن الاخبار قاعده توصلنا انه الوضع مأساوي بره فشنسوي يعني نقعد ننام بالدوام ؟؟ مايصير فقررنا انروح لبيوتنا والحين تعالوا نشوف رحلة العوده للبيت بعد ان توقف المطر ....

طلعت من الدوام والا اشوف هالمنظر بويهي لااله الا الله هذا بداية الخير ... الاوضاع ماتطمن لكن يالله مابدهاش نتوكل على الله ونكمل طريجنا بعد لاحول ولاقوة الا بالله

سيارات غرقانه واللي صاعده الرصيف

هالشاب اللطيف مسكين قاعد يعابل بسيارته اللي اغرقت ويعابل شلون يطلع اهو من الماي

حادث آخر ويشاهد بعض الماره يساعدون اصحاب السيارات في اخراج سياراتهم من الماي

راح اللكزس ... الله يعينك عاد شلون اتروح سيارتك الحين ... سباحه ؟؟

وهذي سياره ثانيه طابعه في الماي ...

المهم خلصت الحين طلعت من الدوام قلت بغامر بعد جان اشوف فوقي والا شنو اشوف ؟؟ هليوكوبتر انا قعدت اتبعها اتبعها قلت بشوف لي وين بتوديني ؟؟ ووراها ووراها ... والله مااخليج اليوم .. خو اشمهنتكم غير تدلون الاوادم عدل ؟؟

عاد هذا يومكم

المهم ماوعيت والا انا بوسط جامعة الشويخ  ولييييييييه عاد اشعرفني انا الحين بمداخل ومخارج الجامعه ؟؟

اطالع والا فعلا انا بوسط جامعة الشويخ  ... انا اللي اذكره كان اكو دوار جك بم والا انا داخل الجامعه ^_^ بس خل اقولكم شغله ترى يومها كانت كل الطرق تؤدي الى الجامعه كل مااروح مكان والا الشرطه والجيش واقفين ويقولون مني مني مني لين ماقطوني بوسط الجامعه

انا لما دخلت قلت الحين بشوف اوادم عشان يطلعوني والا ماكو الا انا والقطاوه لووووووول .. افا وينهم الطلبه ؟؟ وين الطاقم التدريسي ؟؟

وين الناسات وين الاوادم حشا مهجور هالمكان ؟؟

المصافط خاويه من الطلبه والمدرسين

واقعد افتر واحوس واحوس بالجامعه وماشوف احد كلش ملش ... خو وين زحمتكم اللي كل مره امزاحمينا بالدخله والطلعه وينكم هالمره ها ؟

 يوم الواحد احتاج لكم مالقاكم ؟؟ اوريكم

ههههههههههه صدنا واحد متوهق .... هذا المكان يخرع من اساسه وهالشاب اللطيف شموقفه هني بروحه ها ؟؟

والله شكلها السياره ماتوحي كلش عنده شي مني مناك ^_^

وين الدرب يابن الحلال وين مودينا ياحضرة الاستاذ ؟؟

المهم وانا احوس بروحي ابي احد يطلعني من الجامعه ماكو احد ... شوي جان اييلي الفرج

والا بنية هالحلال راعية هالجيب بويهي واقولها ترى انا متوهق وماعرف شلون اطلع جان تقول تعال وراي وانا وراها لين ماوصلتني بوابة الجامعه اللي صوب الميناء  .. وطلعتني يزاها الله خير .. والا جدامي الجسر مال الميناء مادري عاد شيسمونه جسر ميناء الشويخ والا جسر الجامعه المهم اللي هو ... جان اشوف زحمه فوق الجسر قلت شالسالفه ؟؟

لازم اعرف شكو ماكو

جان اصفط سيارتي فوق الجسر وانزل واروح اشوف الصوب الثاني والا اشوف هاللويه

هذا سلمكم الله طريق الميناء صوب جامعة الشويخ ويبين انه الشارع معتفس عفيسه مالها أول ولاتالي ... سيارات غرقانه بوسط الشارع ... وسيارات فوق الرصيف هربا من الماء اللي غطى الشارع بأكمله

رجال الداخليه يحاولون اخراج السيارات الغرقانه من هاللويه اللي انحطوا فيها

قواهم الله الكل قواهم الله

ورجال الحرس الوطني بعد هم قاموا بدور فعال في اخراج السيارات الغرقانه

سيارات فوق الرصيف منحاشين من الماي

أحد رجال الحرس الوطني قاعد يدور البالوعه عشان يمشّي الماي ... يقولك يمكن على الاقل يخفف شوي من هالغرقه ... الله يعطيك العافيه

هذا الحبيب اللي قبل شوي كان داش عرض ... عفست الامه الله يهديك بسالفتك هذي

روح طلع الاوادم اللي طابعين هناك يامعود لاتخليهم حرام عليك

خلونا الحين انشوف بعض اللقطات

يعني رايح تنقذ راعي الرنج يالطيب ؟؟

جنه صاحبنا رجع الظاهر اكسروا خاطره الاوادم اللي طابعه سياراتهم ... الله يجزاك خير يامعود مشكور وماقصرت

أوووووه شغل عدل بو الشباب راح ياب الربع والجماعه اللي عندهم جيبات وقاموا ينقذون الاوادم اللي بسياراتهم ... الله يعطيكم العافيه والله على راسي ربعنا ^_^ فيهم خير حق بعض والله .. الحمدالله هذا احنا يالكويتيين وقت الصجيه يطلع الخير ويبين المعدن الاصيل عسى الله يحفظكم ان شاءالله 

وهذا بو الشباب لي الحين يحوس فوق روسنا ... قوم زين مامنك فود محد وهقني غيرك الله يغربل ابليسك خليتني احوس من مكان لي مكان

الله يسامحك

صوره تبين الزحمه اللي صارت في يوم الغرقه

أحد المواطنين جزاه الله خير قاعد ينظم عملية السير فوق الجسر ... تحمل البرد القارص المسكين وطق اللطمه وقعد ينظم عملية السير

المهم عاد الحين انا حركت بسيارتي بروح البيت والا جسر الشويخ زحمه واقف خطرت على بالي فكره جهنميه وقلت بدش منطقة الشويخ الصناعيه

والا ماكو الا ناخذ العمليه عكس السير لأنه اذا بنمشي سيده مع الاوادم ماراح نوصل

وفعلا بدينا بالسير عكس الناس ... انا خابر هالجسر العالم اتيي من تحت لي فوق احنا خذيناها عكس من فوق لي تحت

يالله مع الخيل ياالشقرا

وليييييييييييه جنه اكو ماي ؟؟؟ يالله خنغامر واندش اشورانا خربانه خربانه

والله وادش والحمدالله الله ستر علي واستطعت ان ادخل منطقة الشويخ الصناعيه

لأول مره اشوف زحمه في الشويخ بهالشكل ... لأنه كل العالم انكتوا داخل هالمكان ... واللي ابتلشوا مساكين البنات والحريم لأنهم مايدلون شي داخل الشويخ الصناعيه واهمه مضطرين مالهم الا هالمنطقه فتعالوا وشوفوا اويووهم مساكين مايدلون

وانا ليما الحين ماوصلت البيت من الزحمه .. يعني تخيلوا الواحد يقعد بسيارته واقف بمكان واحد بالساعه والساعتين فشنو يسوي الواحد في هالحاله ؟؟؟

قلت ماكو الا اقزرها آكل من هالمكسرات اللي معاي بالسياره لين ماربك يفرجها

وبدأت بأكل المكسرات اللذيذه ... بس انا مستغرب من شغله ... أكو حب لونه أصفر ؟؟؟ هذي الحبه اللي بالوسط لونها اصفر حيل اول مره اشوف جذي خابرها بيضه

انزين الحين خلصت من اكل المكسرات ماعندي شي ثاني اسويه فقلت دام الكاميرا معاي خل اجكجك في هالشير لين نوصل بالسلامه

ملاحظه : شير = شجر باللغه العربيه الفصحى

فتعالوا معاي انشوف هالجم لقطه اللي ان شاءالله تعجبكم

على ماخلصت من هالصور والا الحمدالله وصلت بيتنا بالسلامه بعد رحله ساعتين في السياره من الدوام لي بيتنا .. مع العلم انه المسافه في الاوقات العاديه من بيتنا لي الدوام هو عشر دقايق بس ... في هاليوم صارت ساعتين يالله ماعليه اتصير باحلى العوايل

واشرقت الشمس على سماء الكويت الغاليه بعد هذا اليوم الحافل واصبحت السماء صافيه والطيور تغرد والشوارع متروسه من هالصخر اللي نزل من الساحات الترابيه على القار ... وطار بالهوى شاشي وانت ماتدراشي ياقدع

والسلام عليكم ورحمة الله وبركاته

تصوير وتعليق أخوكم دندرن

يرجى حفظ الحقوق جزاكم الله خير ولاتنسون

من سرق فليس منا

العوده للصفحه الرئيسيه