http://www.jazeeraairways.com/
وحجزت فندق روشه ارجان روتانا من بوكينغ وهذي صفحتهم اذا بتشوفون الفندق ضغطوا هني
طبعا مثل ماتعرفون انا ما اركز على تصوير الفنادق اللي اسكن فيها بسفراتي الا القليل جدا ولا اهتم في هالشغلات لان في لها مواقع تتكلم عنها انا اتكلم عن الرحله بشكل عام والاماكن اللي ازورها وان شاءالله اليوم راح يكون جزئنا الاول عن الوصول في اليوم الاول ولنا تكمله في الاجزاء المتبقيه ان شاءالله واللي مجموع الاجزاء في رحلة لبنان كلها 4 اجزاء فاليوم راح يكون الجزء الاول ونتوكل على الله ونبدي
طبعا في البدايه اتفقت مع احد السواقين في لبنان ان ينتظرني في المطار واحاسبه باليوم ووصل سايقنا جزاه الله خير وودانا الفندق اللي ذكرته لكم وهذي بعض اللقطات القليله جدا للفندق مشكلة الفندق الوحيده ان الغرفه اللي قعدنا فيها صغيره نوعا ما لكن في غرف اكبر شوي بس كله بحسابه طبعا
المسبح يطل من الدور الـ 17 في الفندق على الروشه عدل
وهذي الروشه من فوق
المنقذين ناطرين صاحبنا شدعوه يبا ترا المسبح مو عميق لاتخافون عليه يعرف يسبح
وننزل من الفندق ونروح صوب الروشه
ويشوفنا واحد ويقولنا باخذكم بجوله بطراد عند الروشه .. عاد ويعطيكم مميزات الطراد .. ابن الحلال خلاه يخت يقولك فيه ميوزك وبروحكم محد معاكم بالطراد وترتاحون وتاخذون راحتكم واخرتها ترا ماكو شي من هالقبيل .. اقصاه طراد عادي بس يطق فيكم فرّه عند الروشه ويدخلكم بجم مغاره وخالصين
وهذا الشاب اللطيف اللي بيسوق الطراد .. طبعا لازم فيكم لياقه حق النزله صوب الطراريد والصعده مره ثانيه .. والله يعين الشيّاب
وننزل
ونوصل للطراد الميوزك على قولته
شوي شوي لاتطيح ياصديقي
وتبدأ الجوله المميته
ونوصل للمغاره الاولى وندخل
اي لا شفنا شنو داخلها .. ظلمه ماشفنا شي
ونروح صوب الروشه … يالله خلنا نروح يم صخره وبحر
فتحة الروشه
وخّر يالطيب مالنا خلق نتطشر بعيد بعيد يالحبيب
والطيبه لاحقته يالله ماتشوفون شر
وتشوف هالحبيّبه واقفين على اطراف الصخر
والله ان طحتي يا انهم بيلقطونج تلقّط .. وخري عن الطرف لايدزج الهوى بعدين عاد تقولين ياليت اللي جرا ماصار
ونوصل لليال بس جذي خلاص خلصت الرحله البحريه
شوي والا هالحبيب غرقان ويعني قاطين له حبل بينقذونه مادري بتضحكون منو يعني ؟؟
اخرتها لعبه
والطراد معلق ماندري شسالفته …
وهذا بيت على طرف الصخر … هالبيت الله يستر على اهله اتوقع اي عاصفه بتطيره بوسط البحر
وين يالحبيب … لاتتهور
ياسلام يبيله حداق
أخرج من رأسه الجريده وعلبة الثقاب
انا خابر الناس تصيد سمج ماتصيد طراريد
قرقورنا
اها عرفنا الغمنده من رفعة الطراد طلع مخزن
الولد وابوه
ونخلص من عند الروشه ونكمل مشوارنا اليوم
هذا سلمكم الله سيكوند كب موقع افطاري اليومي كل يوم بدال ريوق الفندق الغالي اتريق فيه
ونروح صوب السوليدير والداون تاون وساحة النجمه ماشاءالله ستين الف اسم لها
الاثنين يفكرون
مكان دفن رفيق الحريري بجانب مسجده
ونوصل للقهاوي والكافيهات ونتجول
دواعيس وسكيك وقهاوي منتشره
هالساحه تشتهر بشغلتين شفتهم الصراحه
اول شغله البالونات الصابونيه والثانيه هي الطائرات المروحيه الصغيره الالعاب
ومساءا
وهالطيب يبيع لوحات ويشتهر بتخريعه للناس اللي مو منتبهين الحبيب يتمشى من وراهم بخفي حنين وفجاه يصرخ عليهم يصرقعهم وهني توه خالص من تخريعة بعض الناس
بعدين عاد دورنا مجمع وقالنا سايق التاكسي مالكم الا مجمع A B C واللي يعتبر على حسب كلامه من اكبر المجمعات عندهم بلبنان فقعدنا فيه شويه ريحنا
وصديقي يطالع تلفونه ينطر مسجات توصله مني مناك
شوي والا هذا العرض اللي كان جدامنا بالمجمع
رجل البالون
ماشاءالله عليه شق البالون بيده
لا شقها بالثنتين
يالله دخيلك
يالله خلاص سئفولوه سئفولوه
وبجذي خلصنا الجوله الاولى في بيروت واشوفكم ان شاءالله في الجزء الثاني في رحلات من الجبل اللبناني والارياف اللبنانيه ان شاءالله
في امان الله
للتعليق على الموضوع اضغط هنا
العوده للصفحه الرئيسيه
