8-11-2008


ياسلام عالجو بدأ الجو يبرد اياباااااه حق البر والكشتات والشغل الزين ^_^

المهم مساكم الله بالخير او صباح الخير ياوجيه الخير ... من زمان عنكم يالتعبانين ليش ماتسألون

تعرفون خليفه ؟؟

منتجع خليفه الجري في يوم من الايام ذهبنا للتنزه وقضاء بعض الاوقات الجميله اللطيفه هناك فقلنا مره وحده يالله تشوفون المنتزه حق اللي ماشافه

بداية ... ترا خوش منتزه بصراحه اجوائه عائليه بحته صغير ومجكنم حتى عيالكم اذا بيلعبون تلاقونهم جدامكم مايباعدون كلش يعني مثل الدوره رايحين ورادين جدام عيونكم عكس الخيران اذا الواحد طلع من الشاليه مايرد الا حق البلعه والا النوم

هني الشاب اللطيف الأمن يجيك على السيارات اللي داشين واللي طالعين .. خو الأمن ظروري ومطلب لكل عائله فالواجب على المنتزه التجييك على اصحاب السيارات والافراد

قاعد يعدهم ... 1. 2 . 3 .4 .....

يالله اخليكم شوي تشوفون اجزاء من المنتزه

نافوره اول ماتدش المنتزه بويهك

حمامات السباحه في منتصف الشاليهات حق اليهال طبعا

 

قعدات رومانسيه

منقذ متأهب لإنقاذ مايمكن انقاذه

 

 

يوجد في المنتزه بعد صالة جيمز ... انترنت ... بلياردو وكوفي شوب

 

ماذا يتامل ياترى من الكوفي شوب ؟؟

نعم انها القواري المتعددة الاشكال للتأجير

ويأتي الليل بهدوئه الساحر ... ويطل علينا القمر يشدو ويقول ... ياليلة الأنس عودي ... عودي وهّلي

مال تقعد على هالكراسي مجابل حمام السباحه وتتأمل بالرايح والراد

شقاعد يسوي هالحبيب ؟؟ لاتنتف اوراق الشجر ياولد ... خربت البيئه

ياحليلك ... ذكرني باللي يطلعون في مسرحية البيت المسكون اظن مادري القصر المسكون نسيت اسمها ... خو كل عيد طالعيلنا بمسرحية رعب ناقصين تخرع عيالنا

الله يخليه لاهله قولوا امين

ها اشحقه يايب كاسكوك وياك ... خايف عليه محد يوكله في البيت يعني ؟؟

خو سبله هده خله يطير وفك عمرك لاتحاتي لا أكل ولابطيخ

يخرب بيت عدوينكم على هالقاري اللي راكبينه تقول قاعدين بسيلان ... لا وعلى الزرع تمشون بعد ها ؟؟

خوش شي الصراحه انا بعرف ماطلعت روح اللي يسوق القاري واهو يمشي على الزرع ؟؟

وفي الختام يعطيهم العافيه القائمين على المنتزه لما يبذلونه من جهد في سبيل راحة رواد المنتزه

واللي عرفته انه في تغييرات قاعده تصير بيطورون بالمنتزه بيخلون فيه جزء مثل الفندق نظام غرف فندقيه غير عن الشاليهات

العوده للصفحه الرئيسيه