السلام عليكم ورحمة الله وبركاته

المهم شلونكم اليوم ؟؟ طيبين ان شاءالله ؟؟ حلوين بعد ؟؟ زينين ؟؟ ماشين ؟؟ راكضين ؟؟ المهم في الأخير اتمنى ذلك يعني بالانجليزي آي هوب ذات ... عشتوا انجليزي بعد ... وبعد التحية والاطمئنان على صحتكم ندش بالموضوع اللي اهو احتفال هلا فبراير من ساحة العلم اللي صار يوم الجمعه 16/2/2007 على شارع شاطئ الشويخ  مقابل ساحة العلم ... آخخخخ يازين هالشاطئ

بداية الاحتفال واعلام الكويت اترفرف ... عسى دوم عاليه على الفرح والنصر يارب

خيالة الداخليه يتقدمون مسيرة الاحتفاليه

موسيقى الداخليه بعد

فرقة بلال الشامي ويامعيريس عين الله تراك والقمر والنجوم تمشي وراك ودم طق طق دم طق

الحين انيي نشوف بعض الفرق اللي شاركت في الاحتفالية

كاوبوي مضروب ... انا خابر عيال الكاوبوي من امريكا هذا شدخله بالسالفه الله اعلم يمكن متجنس

والله قامت المعلومات تتخرط عندنا ترى ... حاطة ريشة طاووس هندي على راسج ... والشاب اللطيف اللي يمشي وراج مكانه من الاعراب صح لكن انتي هم مضروبه مثل رفيجنا راعي الكاوبوي الا ان كانوا مسوين خلطه صينية على هنديه هذا شي ثاني

نروح الحين حق الفرقه الروسيه

أهم مافي الموضوع الصناقل اللي تمشي آخر شي ... شطولهم بل ^_^ عاد يقولكم شارع شاطئ الشويخ فيه جم شبّة بالشارع محترقين ودايم يحترقون يبيلنا جم واحد من هذيل عشان تبديل اللمبات ... انزين عندي استفسار هذيل الطوال اتهقون يقدرون يلعبون كره ؟؟ هذا شلون تطيحله سلايت وين بالضبط ؟؟ على ركبته مثلا والا على رقبته ؟؟ خو بالمكانين ماتقدر تطوله

هالصوب يبا الكاميرا مني

اي جذي مو مثل صاحبتج اللي قبلج ماتطالع

حداق روسي ماسك جزّته حق الحداق ورايح .. عاد والله زينه حق التقمبر.. ماشاءالله ريوله طوال يوصل لي فيلجا على ريوله من غير مايحوش بطنه نتفة ماي

تعالوا نشوف الفرقه النوبيه

والبنت بيضه بيضه بيضه ... والبنت بيضه وانا اعمل إيــــه ؟؟

انزين البنت بيضه احنا شكو ؟؟ خو الله خالقها جذي شتبون بالضبط ؟؟ اغنيه لاكلمات ولابطيخ

عدل عاش عاش الدوده .. ويمشي على الدانه اي والله ويمشي على الدانه اي والله

اهم شي السنفور العود حاط ايده بحلجه ... ليـــش يعني مستحي اسم الله عليك ؟؟

طلعوا طلعوا الظاهر الله يحسن جزاهم

تعالوا نشوف عروض السياكل

يالله بالدور ياشباب اثنين اثنين مانبي تخطـّر

ياعيني طاع الريل وين حاطها

وخر ياصبي لايطشرونك ترى ماتسوى عليك بعدين ^_^

ها تعبتوا ؟؟ ايــه زين عيل ^_^ مادري شمسوين عاد .. وعليه عليهم طقهم البرد والهوى وانخشوا هني

انزين عاد قعدوا على الكراسي اللي جدامكم ليش على الرصيف قاعدين ؟؟

الحين نروح حق الالعاب الناريه .. طبعا انا مالي خبره بتصوير الالعاب الناريه اهيه محاوله وان شاءالله تعجبكم

التصوير من غير حامل ثلاثي يعني على الله وعلى مسكة الايد من غير ترايبود ولاشي والحمدالله طلعنا بهالجم صوره من مكان الحدث ^_^

هذي كانت جولتي في احتفال ساحة العلم واشوفكم ان شاءالله في مناسبات أخرى قادمه بأذن الله تعالى ^_^

تصوير وتعليق دندرن