16 /11 /2005

السلام عليكم ورحمة الله وبركاته

شلونكم ان شاءالله بخير ؟؟؟ شلونكم ويه هالمطره الحلوه اللي طقت اليوم ؟؟

عسى بس كلكم زينين ؟؟ ان شاءالله يارب كلكم زينين

المهم اليوم الموافق 16 /11 /2005 كان يوم مش اي يوم ... بتقولولي شلون ؟؟

انا اقولكم .. طبعا وانا نايم اللهم لك الحمد ... وفي ليلة ظلماء يفتقد فيها البدر ... خو اكيد يفتقد فيها البدر لأنه كان غيم  والظلام دامس وانا نايم اسم الله عليكم والا مااسمع الا طرباااااخ طق ددم طاااااااخ والا هالاصوات الغريبه والتطقطق اللي مادري شلون صاير ... اهو شير يمشي احبال تطير قراطيس ... اصوات رعد واضواء برق ورياح عاتيه قويه جدا

ياربي شنو هذا ؟؟  والا اثاري الدنيا معفوسه بره مطر قوي وسيل وخير من رب العالمين سبحانه

انا قمت من النوم الساعه 7 تقريبا على هالاصوات هذي جان اطل من دريشة غرفتي والا ماكو ماشوف شي جان اقوم اغسل وابدل ملابسي واطلع بره بشوف شصاير ... والا شارعنا مالكم امل تطبونه  لأنه سلمكم الله وزارة الاشغال قاعدين يشتغلون بفريجنا والله لايوريكم الطين لي وين واصل لوووووووول خلوها على الله رحت يبت اعيالنا الصغار من المدرسه هدوهم يقولون مايبونهم اليوم لووووول جان ارد البيت واتريق واخذ احدى السيارات اللي شفتهم جدامي في البيت وطقيتها سلف واحرك ... اهم شي اني طقيتها سلف ..

المهم طلعت على الشارع الرئيسي اللي في منطقتنا العامره

هني كانت الساعه تقريبا 8 صباحا والدنيا تقول الساعه سبع بالليل لااله الا الله

جان اطلع على الخط السريع قلت بطقلي فره حوالين المنطقه بشوف شكو ماكو

والا عاد اخذ من هاللي يمرونك صواريخ ... يايبا ترى الشارع مبلل ومطر ومايبين منه شي شكو دايسين ياعلكم شقول ؟؟

والا يعني اثبات وجود بس ؟؟ يعني ترى انا اعرف اسوق في المطر ها ؟؟

المهم انا طلعت ومادري ماجيكت على السياره اللي راكبها هىهىهىهى

والا اثاري مساحتها ... حد أم المهزله لووووووول اول شي ماتمسح عدل وثاني شي تطلع اصوات غريبه تقول مكينة ديزل

طرررررررررررررر طررررررررر طررررررررررر طررررررررررر

وشخص الله يخليه ان شاءالله ويسلمه كنت قاعد احاجيه بالموبايل ومستلمني ضغاط على صوت المشاشات هىهىهىهى

المهم كملت طريجي ووصلت لأحد الجسور ... يعني بطق فوق حدر وبرجع بيتنا

والا اثاري الشارع حد أمه واقف ... وانا هني واقف فوق الجسر وقاعد اصور

طبعا كملت طريجي يعني بشوفلي درب ثاني

عاد انتوا في هالاجواء حطوا بالكم من الشارع يعني خلوا مسافه بينكم وبين السياره اللي جدامكم مثل المسافه اللي بيني وبين الخنفسانه الحمره  ... وبينكم وبين هالسياره اللي بتشوفونها الحين ورانا

أحم وازداد المطر ماشاءالله تبارك الرحمن

وماقمت اشوف السيارات اللي وراي ... وانا مكمل بطريجي مادري وين رايح ههههههه

ماوعيت الا انا عالبحر

 المهم وتشتد الرياح العاتيه ... ويصير الهوى حد أبوه قوي

ويلاحظ هني ميلان اشجار النخيل العملاقه تتمايل مع شدة الرياح

وانا مكمل طريجي على خط البحر

عاد الحين تعالوا نشوف شنو صار وشنو ماصار على خط ال��حر بسبب شدة الرياح وقوة هطول المطر

أول شي شفته اشارات المرور انقلبت فوق تحت من قوة الريح

لاحظوا الشبه شلون صايره واشارات المرور لي وين متجهه الى الاسفل .. افترت يعني

وكملت طريجي والا اشوف هالاعلان مجفي على ويهه

المهم وصلت سوق شرق

لوووووووول مو مترقع اليوم كلش مساحة السياره اي شي ... وجامة السياره انكسرت هىهىهىهى

يالله فدوه ان شاءالله ^_^

المهم وقفت قلت بطالع شوي معالم الديره والا الديره مالها ملامح ... من كثرة الغيوم وهطول الامطار لااله الا الله

اختفت عمارات وملامح الديره

هههههههههههه ترى هذا مو بالبحر لأ هذا على اليابسه ومناك من ورى السفينه تبين غرفة التجاره مو مبين منها الا القليل

ونشوف الصوب الثاني ... والا ديوان الموظفين والعمارات المجاوره ... ههههههه في احد مداوم اليوم ؟؟

يابختهم الحين اكيد قاعدين بمكاتبهم والغيم يدش من هالدريشه ويطلع من الدريشه الثانيه

ونكمل شوي ونوصل لي برج التحرير

ههههههههه اثاري هم الغيم يدش من هالدريشه ويطلع من هالدريشه

المهم ونكمل ونكمل طريجنا ونوصل لي وزارة النفط مادري الطاقه المهم وحده منهم

مايبين مايبين ^_^ ستوب قف هوب

ونكمل شوي والا اشوف هاللي واقفين يعطيهم الف عافيه الصراحه

رجال الشرطه وعمّال

ينظمون عملية السير ويحاولون يوخرون الشبّه اللي كانت طايحه بوسط الشارع قواكم الله شباب

المهم ونكمل مسيرتنا داخل الديره شوي صوب العاصمه كويت سيتي

وامسك احد الطرق السريعه

واشوف والا الشارع الثاني ماشي

وشارعنا واقف

والدوريات تقوم بعملها على اكمل وجه ... يعطيهم العافيه والله هالمره صج تعبوا اهمه مع الاسعاف والمطافي والاشغال والبلديه والتناكر

وانا ناطر في سيارتي

ياربي شسوي بعد الله كريم

موبيدي ^_^

والشارع الثاني يحروني ماشي سايدهم

المهم كملت طريجي واحاول اوصل البيت .. خلاص بروح بيتنا خو ليمتى هالزحمه

وانا ماشي وخير اللهم اجعله خير والا شنو اشوف ؟؟

هههه زوم زوم زووووووووووووم بعد زوووووووووووم

والا هالحبايب واقفين فوق جسر للمشاة وطايحيله تصوير ... شدعوه يبا ضبطونا ؟؟

ومشينا في طريق مقمر ... تريم تريم تبدوا الفرحة فيه قبلنا وضحكنا ضحك طفلين معا وعدونا وسبقنا ظلنا

المهم وانا ماشي في طريجي واطالع السياره اللي انا راكبها والا ماكو عداد لوووووووووول

اثاري من اليوم امشي على عماي هىهىهىهىهى

ضغط السياره واحد ونص والجير على الـ D والعداد صفر   يالله مو مشكله قازره يبا ... خو من اولها مو مترقعين بالسياره

لامشاشه مثل الاوادم والجام انكسرت والعداد مايشتغل الله يستر بس

شوي والا عاد جان اقول بعد مابدهاش

مساحات السياره من امه اخرطي ... ماقام يبين منها شي كلش ملش

والا جود انا قريب من منطقة الشويخ الصناعيه ...اي قلت خل ازرق على اي محل ابدل عنده مساحات السياره بشوف ماقمت اشوف شي ^_^

والا وين قاطني الشارع ؟؟ صوب ميناء الشويخ صوب دخلة جامعة الشويخ ... وليــــــــه هالمكان عاد كل مايطق مطر قوي يوقف والا يغرق والا انا بوسط المكان ... بس تدرون شلون يبا ؟؟ خل نتوكل على الله ونكمل طريجنا خربانه خربانه بعد

ويلاحظ الشارع ماقام يبين من الرصيف والشارع

وطقينا فوق حدر وخذينا جسر الشويخ الطويــــل

بعد مايبيله متعودين على هالجسر كل مطره لازم يوقف

مو شي يديد اشوه الحمدالله شارعنا ماشي وشارعهم واقف ^_^ كيفهم عاد يفكون اعمارهم وان شاءالله الله يفك عوقهم

شوفوا الصوره اليايه وقولولي شنو الغلط فيها ؟؟؟

الحين كل السيارات اللي بالشارع الثاني يايين صح عكسنا الا راعي الباص هههههههههه قاعد يمشي عكسهم

شنو عناد فيهم يعني والا شنو بالضبط ؟؟

لاتروحون بذاك الراي يبا هذا مقلوص لوووووووووول يعني خربان الباص وكرين قاعد يسحبه فقط لاغير

وامكل طريجي باتجاه جسر الغزالي اللي كله تصير افلام فيه ههههههه

جان اوصل جسر الغزالي

ومساحة السياره الرقله بدال ماتنظف الجام قاعده توصخه ... والسيارات في الجهه المقابله واقفين لاحول ولاقوة الا بالله

الحين سؤال ... فرضا طق مطر قوي والسيارات محشورين هني وغرق الشارع الله لايقولوه شلون يعني ؟؟

الحمدالله الله ستر عليهم

ولازالت الرؤيه معدومه عندي والسبب مساحاتي السكّه

المهم جان اوقف عند اول محل لتبديل المساحات

الحين تعالوا شوفوا الجام من بعد المساحات اليديده

ايابااااااااه شغل عدل ... يازين الشارع قام يبين يحليله والله اي كا طلع ويهه اسم الله عليه

المهم عاد انا قربت اوصل البيت الحمدالله ودخلت فريجنا ولله الحمد ... وصفطت عند بيتنا

واطالع جدامي والا اشوف هالشبـّه هههههههه من قوة الريح مالت على كتر ... الظاهر حظها مايل امسيجينه

زين ماطاحت على السياره اللي يمها

هذيل عاد صبيان ييرانا قاعدين ينظفون الفريج لوووووووووووووول

اي يبا حك بطنك حكه ... الظاهر يوعان الحبيب

شوفوا بس عفيسة الفريج ... والله مشكله لوووووووول

والحمدالله وصلت البيت بالسلامه وانتوا ان شاءالله ماصارلكم مكروه

وعسى ربي يجعلها امطار خير على الكويت وعلى كل بلاد المسلمين يارب

وخلصت وملصت ويت الديايه وعنفصت

العوده للصفحه الرئيسيه