معرض الكتاب وما ادراك ما معرض الكتاب … طبعا الشباب اللي في مقتبل العمر اللي مثلي اكيد يتذكرون ايام قبل ايام معرض الكتاب ايام رحلات المدارس لما يزخونا من صباح الله خير من المدرسه لين الساعه 11 الظهر لا ومايعلمون قبلها بيوم عشان الواحد يعمل حسابه اذا بيشتري شي مني مناك … لا انسى يعلمون نحاسه شكلهم عشانهم اهمه المدرسين والطلبه الصغار طاف لايتثقفون ولاهم يحزنون مثل مايروحون يردون … المهم عاد كل واحد فيكم يتذكر اللي يتذكره في معرض الكتاب
عاد معرضنا هالسنه رقم 33 يعني صارله تقريبا 33 سنه واهمه يسوون معرض الكتاب .. شدعوه رسمات كاميرات المراقبه اللي عالباب شدعوه العالم شبيسوون داخل يعني ؟؟
نبلش في التجول داخل المعرض … والله شكله تغير عن ايام قبل .. تلاقون اللي يتصفح من صجه وتلاقون اللي يحوس على الفاضي مايصدق على الله من يفتح اي معرض والا تلاقيه هناك … اهو معرض كتاب تلاقيه اهو معرض اكل معرض اقمشه سوريه معرض عطور .. اي شي تلاقيه هناك … المهم معرض وبس لا وتلاقيهم اثنين ماسكين ايدين بعض ويفترون بالمعرض جنهم طلبة مدارس ايام الابتدائي الله يهديهم بس على كبر … يعني كلش مو شي منظركم وانتوا ماسكين ايدين بعض لي هالدرجه تحبون بعض مثلا ؟؟ اي هد رفيجك ترا مايضيع لاتخاف عليه
يالله نتجول ونشوف بعض الكتب العجيبه الغريبه في المعرض
انا ابيكم تركزون على الكلام المكتوب في القصه فوق
الكلام شيقول ؟؟؟ يقول سلمكم الله
قال العملاق .. وهو يزمجر … اهم شي انه يزمجر … انزين الياهل اللي بيقرا القصه شعرفه بمعنى يزمجر ؟؟ المهم نكمل
قال واهو يزمجر … انا حميرون اعاني من الم في اسناني واحتاج لطبيب اسنان … كفو والله عليك ياعملاق يعترف انه حميرون شلون عملاق وحميرون ؟؟ جذي تعلمون اليهال على هالكلمات ؟؟
حميرون ومادري شنو ؟؟ ماعليـــــــــــه طاف يايبا انزين عرفنا اللي تعوره اسنانه يروح طبيب الاسنان بس حميرون مالها داعي كلش
ماشاءالله هالاطلس ماينقرض من سنة الطواعين وهو موجود تبارك الرحمن … عاد كان من الكتب المفضله عندي غرامي شي اسمه اطلس
والله لو تدققون في اسامي الكتب الموجوده تطقون على روسكم من اللويه خل نلقي نظره شوي على بعض الكتب :
1 – مخنوقه … انزين شنسويلج يعني ؟؟ جابلي البحر وان شاءالله تنفك عقدتج
2 – الرشاقه في 30 يوما … احلف بس ؟؟ انزين فرضا واحد وزنه فوق الاميه شلون يصير رشيق في 30 يوم ؟؟
3 – سعيده كوني امرأه … انزين هم الريال سعيد كونه ريال شالمشكله يعني ؟؟
4 – الطرق الثلاث الذكيه لنظافة المنزل المثاليه … خو شنو اكو غير المخمّه في تنظيف البيت ؟؟ احلى شي واسهل شي واحسن شي ليش طرق وماطرق ؟؟ اقصاها غبره بتطير وتسبب حساسيه في الخشم والصدر بعد لاطرق مثاليه ولابطيخ
5 – مابعد الطلاق .. بعد شنو اكو بعد الطلاق ؟؟ البنت ترجع لبيت اهلها والريال يشوف حياته بعد شنو اكو زياده ؟؟ الا اذا كان الكاتب عنده شي ثاني الله اعلم عاد
وغيرها الكثير الكثير من الكتب اللي تفيد الياهل وتفيد الرجل وتفيد المرأه
لا والمصيبه مكتوب على البنر الكتب الاكثر مبيعا … انزين اكثر مبيعا وين يعني ؟؟ بالعالم العربي والا الدنيا العالميه ؟؟
خنروح حق كتاب بروحه ماخذله زاويه وقاعد
اسم الكتاب عايزه اتجوز … طيب واحنا مالنا ماتجوزي يابت … شكو فيج روحي دوريلج ريل وتزوجيه احنا شكو فيج يا مال الحـ ……
اشتغلت خطابه حق نفسها … صج عاد ودي اشتري هالكتاب ودي اعرف شنو مضمونه هل هو انه البنت تقعد تدلل على عمرها عشان تتزوج والا شنو بالضبط ؟؟
نخلص من هالبعض الكتب ونروح نكمل مشوارنا
ايـــــــه ياعبد الناصر راحت ايامك وبقت مذكراتك
وشفيهم مسطرين الكتب جذي بهالطريقه يعني ؟؟
فرضا واحد حنّج ويبي الكتاب اللي بالنص شلون بتطلعونه ؟؟
ياعمري ياتان تان احبه هالولد انسان ذكي وطموح لدرجة كبيره اهو مع البكله المدهنه مالته ولد الذين يغرق ويطب في البحر وبكلته ماتتحرك ماشاءالله خوش فازلين مدهنها فيه .. بس والله ترى جد قصصه مفيده جدا اتعلم الواحد الذكاء والصبر مع العلم انها كتبت في زمن قديم جدا بس تظل الى هذه الساعه من القصص المحببه لدى شريحه كبيره من المجتمع
هتلر ونهاية العالم … لو مو هالغرور اللي فيه جان اهو خوش واحد
مادري انا خابر المعرض اسمه معرض الكتاب مو معرض الديفيديات … الديفيديات شكثرهم هناك يبا سوولكم معرض للديفيديات وفكونا
ياعيني على مجابل الزباين … الحبيب مخلي المحل وشابك مسنجر
هذا لاحقنا لي هني بعد ؟؟ ياعمي ماتمل انت ؟؟ في كل مكان موجود ؟؟ بالتلفزيون بالكتب على جناط اليهال ملوت المدارس في النوادي الرياضيه … شدعوه عاد مارادونا مع الويه
عاد يابووووي لاتشوفونه بالتلفزيون … المباراة الوحده تقعد 6 ايام يلعبون فيها ماتخلص .. الشوته الوحده يبيلها يومين على ماتوصل … شدعوه صاروخ عابر القارات مو شووووته لا وتروح الكره فووووووووووووووق وبعدين تنزل اسقاط على القولجي شدعوه شدعوه شنو هالعيار المضبوط من الكابتن ماجد يشوتها من قول لي قول وتنزل في الاخير اسقاط على القولجي الثاني .. لا وعاد وكله كوم واذا واحد فيهم بيطيح سلايت حق لاعب الفريق الخصم .. يزلق حلقتين على مايوصل حق اللاعب الثاني ويقطع الكره منه … واهم مافي الحلقات المؤثرات الصوتيه اللي في المسلسل …. آآآوج وآآآه وآآآآه منها وويحك يامادري منو … داشين هوشه مو لعب كره الله يسلمهم
الحين نروح لبعض الكتاب والكاتبات الكويتيين … يستاهلون عيالنا على هالمؤلفات اللي ألفوها خوش روايات وقصص الصراحه
رواية بلا والي للكاتبه حوراء الحبيب
ساره الدريس لها كتابين حاليا هذا واحد منهم اسمه على عتبات الرذيله والثاني اسمه الى جرحي الحبيب
الكاتبه منى العنزي وليله في فيلكا
دايموند للنشر … متخصصه في نشر مؤلفات الشباب الكويتيين … ماشاءالله عليهم ضغط الله يعطيهم العافيه ويوفقهم ان شاءالله … منها للأعلى ياشباب
كتاب النساء من الوفره والرجال من العبدلي .. ردا على النساء من الزهره والرجال من المريخ بس بطريقه كويتيه
عبدالوهاب السيد واحدى مؤلفاته الجميله
معرض صغيرون لدعم الشباب والشابات في فن الرسم
نكمل رحلتنا من بعد هالبريك الخفيف … ونشوف ابو المناقير
انا اول مره اعرف انه في بو منقار سمك هذا شلون صاير ؟؟؟
يالله طلعنا بمعلومه انه في بو منقار سمك … بس تهقون شنو الحوار اللي دار بينهم لدرجة مخلي صاحب المحل راز الكتاب اول شي
الله ياذيج الايام القديمه … كانت من الايام الحلوه اللي صعب جدا تتعوض
السر ونساء خالدات شنو سر العلاقه بينهم ياترى ؟؟ هذا ماسوف تعرفونه في الايام القادمه
شسالفتهم العالم كتبهم اغلبها موجهه للمرأة ليش عاد اسرار الحريم .. فضايح الحريم .. رومانسيات زوجيه .. نساء مادري شصار عليهم … كله عن الحريم جنه ماكو في هالدنيا الا الحريم يالله عاد الحين يشبون علي
اسم الكاتب جنه اسم مطرب كويتي قديم
بيـــــــــــــــــــــــــــــه من امه بيــــــــــــــــــــــــــــــــــــــــــــــــــــــــــــــــــــــــــه شخباري هذيل ؟؟
رجعونا حق زمان اول ايام ماكانت الخمسين فلس اتييب عصير سانكيست وكتكات وبفك
بس شرايكم بالحصان المسحور
اويلاه على الطبله المسحوره … شكلها تلزم ايقاع بروحها وتطلع فواصل من كيفها يبيله الواحد اييبها حق السمرات والقعدات ويخليها بروحها تطلع فواصل مع المطرب
انزين سؤال مو ملاحظين انه اغلب القصص هذي كلها سحر بسحر ؟؟
الحصان المسحور .. الطبله المسحوره .. التاج المسحور … شنو ماكو الا السحر تعلمون اليهال عليه ؟؟ الله يكافيهم شركم اعوذ بالله منكم
والله ماعرفنا الحين اسمه جوليفر والا سندباد وعلي بابا اهمه اللي امسكوهم الاقزام ؟؟ خربطوا معلوماتنا ترا مره جوليفر اللي جاغدينه الاقزام ومره سندباد وعلي بابا وعلاء الدين هالشيبه
على العموم مايشوفون شر
هذي كانت جولتنا في معرض الكتاب الـ 33
وفي الختام لايسعني الا ان اتقدم بالشكر الجزيل لمتابعتكم الميمونه واسأل الله العلي القدير الصحة لي ولكم
والسلام عليكم ورحمة الله وبركاته
واشوفكم على خير ان شاءالله